Елдос Сметовтің бапкері шәкіртінің спортты қашан қоятынын айтты
Париж олимпиадасында алтыннан алқа Елдос Сметовтің жеке бапкері шәкіртінің спортпен қашан қоштасатындығы туралы айтты. Бұл туралы Stan.kz ақпарат агенттігі хабарлайды.
Фото: ҰОК
Елдос Сметовтің жеке бапкері Ғалымжан Жылгелдиев шәкіртінің салмағындағы бәсекелестік пен спортты қашан қоятындығы туралы айтты.
"Елдос Лос-Анджелесте өтетін олимпиадаға дайын болса, әрине, жеңетініне сенемін. Бірақ шындықты айту керек. Елдосты жастар жеңіп жатса, ол өзі де күресті қоятыны анық. Олар жеңе алмаса, кешірім сұраймыз. Елдосты жеңсін, сосын жарыстарға барсын. Мықтылар бару керек қой. Кәсіби спортта жасқа емес, нәтижеге қарау керек. Күресің жүріп, жеңіп жатсаң – тек алға!" - деді Ғалымжан Жылгелдиев.
Айта кетейік, бұған дейін Ғалымжан Жылгелдиевтің ҚР Туризм және спорт министрлігі ұйымдастырған "Үздік" атты салтанатты шарада "Үздік жаттықтырушы" номинациясын иеленгенін, ал дзюдошы Елдос Сметовтің "2024 жылдың үздік спортшысы" жүлдесін еншілегені туралы жазған едік.
