Экс-министр Қанат Шарлапаев жаңа қызметке келді

Экс-министр Қанат Шарлапаев жаңа қызметке тағайындалды. Бұл туралы Stan.kz ақпарат агенттігі хабарлайды. 

Фото: baiterek.gov.kz

Шарлапаев "Самұрық-Қазына" АҚ директорлар кеңесінің мүшесі болып сайланды. Бұл туралы ақпарат KASE қазақстандық қор биржасының ресми сайтында жарияланды. 

"Самұрық-Қазына" ұлттық әл-ауқат қоры" АҚ-ның жалғыз акционерінің 2025 жылғы 12 сәуірдегі шешімімен Қанат Шарлапаев директорлар кеңесінің мүшесі болып сайланды", – делінген хабарламада. 

Енгізілген өзгеріске сәйкес, енді "Самұрық-Қазына" ұлттық әл-ауқат қоры" АҚ директорлар кеңесі жеті адамнан тұрады:

- Олжас Бектенов – директорлар кеңесінің төрағасы, премьер-министр;

- Болат Жәмішев – "Самұрық-Қазына" қорының тәуелсіз директоры;

- Лука Сутера – "Самұрық-Қазына" қорының тәуелсіз директоры;

- Вонг Хэн Фай – "Самұрық-Қазына" қорының тәуелсіз директоры;

- Нұрлан Жақыпов – "Самұрық-Қазына" қоры басқарма төрағасы;

- Мұхаммед Жамиль Әл Рамахи – "Самұрық-Қазына" қорының тәуелсіз директоры;

- Қанат Шарлапаев – президент көмекшісі. 

Еске салсақ, 2025 жылдың 28 ақпанында Қанат Шарлапаев өнеркәсіп және құрылыс министрі лауазымынан босатылып, президенттің экономикалық мәселелер жөніндегі көмекшісі қызметіне тағайындалған еді.