Ата-аналары несие алған: Маңғыстаулық жас параспортшылар мемлекет қаржыландыратын жарысқа өз ақшасына барған
Фото: Lada.kz
Маңғыстау облысының жас параспортшылары бочча ойыны бойынша өтетін республикалық жарысқа мемлекеттік қаржы бөлінбегендіктен өз ақшасына баруға мәжбүр болған. Кейбір ата-аналар жарысқа ұзақ дайындалған балаларын жіберу үшін тіпті несие алуға мәжбүр болғандарын айтты. Бұл туралы Stan.kz ақпарат агенттігі Lada.kz порталына сілтеме жасап хабарлайды.
Ата-аналардың айтуынша, балалар 9 қарашада өтетін жарысқа бірнеше ай бойы дайындалған. Олар тамыз айынан бері жаттығып келген. Бірақ облыстық дене шынықтыру және спорт басқармасынан қаржыландыру болмаған. 31 қазан күні кешке ортақ ата-аналар чатына басқарма жарысқа баруға мүмкіндік жоқ екенін, қаражат бөлінбегенін хабарлаған.
"Біз қатты абыржыдық. Балалар бірнеше ай бойы дайындалды. Ал жарысқа бір апта қалғанда ешкім ешқайда бармайды деген хабар алдық. Содан кейін біз Маңғыстау облыстық бочча федерациясының президенті Жанбырбай Матаевқа жүгіндік. Ол облыстық спорт басқармасының басшысы Мақсат Мұқашқа хабарласты. Матаевтың айтуынша, ол жарысқа қатысудан бас тарту туралы шешім болмағанын айтып сендірді. Кейін бізге қате ақпарат берілгенін түсіндірді. Сол кезде біз билеттерді өз қаражатымызға сатып алдық. Барып-қайту билеті 240 мың теңге шықты. Кейбір ата-аналар несие алуға мәжбүр болды", – деді ата-аналар.
Алайда, олардың айтуынша, уәде етілген қаржы әлі де бөлінбеген. Соған қарамастан, Маңғыстау облысының командасы Қазақстан кубогына қатысу үшін өз есебінен жолға шыққан.
"Біз билеттерді өзіміз сатып алып, қонақүйді өзіміз брондап жатырмыз. Балаларымызды үміттендіріп, қалдыра алмадық. Олар көп дайындалды, бұл жарысты асыға күтті. Егер бәрін өзіміз төлеуге тура келсе де, барамыз. Бірақ билік ерекше қажеттілігі бар балаларға бөлінетін қаражатты үнемдегісі келетіндей көрінеді. Шенеуніктер көмек береміз деп уәде етті. Бірақ сөзінде тұрмады. Қаржы бөлінетіні жайлы нақты жауап әлі жоқ. Кейбір ата-аналар ақшалай мүмкіндігі болмағандықтан, сапардан бас тартуға мәжбүр болды", – дейді олар.
Журналистер облыстық спорт және дене шынықтыру басқармасының басшысы Мақсат Мұқаш пен оның орынбасарына хабарласа алмады. Ал ведомствоның баспасөз қызметі басшылықпен байланысуға тырысып жатқанын айтты.
“Қазақ әйелін аяққа таптайды, байлар жарысады: Тоқал алуды заңдастырудың соңы неге әкеп соғады?
