Астанада Нұрсұлтан Назарбаевтың ескерткіші алынып тасталды
Желіде бұрынғы президент Нұрсұлтан Назарбаевтың 2020 жылы 80 жылдығында ашылған ескерткіші Астанадағы Ұлттық қорғаныс университеті аумағынан алынып тасталды деген ақпарат тарады. Бұл туралы Stan.kz ақпарат агенттігі хабарлайды.
Ұлттық қорғаныс университеті ескерткіштің жойылғаны туралы ақпаратты растамады және жоққа да шығармады.
Қорғаныс министрлігіне Stan.kz тілшісі сұрау салды. Министрлік Ұлттық қорғаныс университетінің аумағында тұңғыш президентінің ескерткішін бөлшектеуге (демонтажға) қатысты ақпаратты растады.
“Қорғаныс министрінің бұйрығымен "тұңғыш президенті атындағы Ұлттық қорғаныс университеті" атауы "ҚР Ұлттық қорғаныс университеті" болып өзгертілді. Осыған байланысты Ұлттық қорғаныс университетінің аумағында орналасқан Нұрсұлтан Назарбаевтың ескерткішін Қарулы күштер Мемлекеттік әскери-тарихи мұражайының ғимаратына көшіру және орнату туралы шешім қабылданды. Қазіргі уақытта ескерткіш қорғаныс ведомствосы ғимараттарының бірінде уақытша сақталуда тұр. Тиісті дайындық шараларын өткізгеннен кейін ескерткіш мұражай ғимаратына көшіріледі”, – делінген хабарламада.
Айта кетейік, бұған дейін Астанадағы "Нұр-Сұлтан" және "Нұр-Сұлтан Нұрлы жол" вокзалдарының атауы өзгертілетіні туралы жазған едік. Сондай-ақ Назарбаев қоры Алматыдағы ғимаратын президент әкімшілігіне бергенін хабарладық.
Назарбаев қорының мәліметінше, 2023 жылдың мамыр айында Алматы қаласы Ганди көшесі, 10 мекенжайында орналасқан әкімшілік ғимараты мемлекет меншігіне өтеусіз өтіп, президент істері басқармасының балансына қосылған.
Алматыдағы президент резиденциясы бұзылғаннан кейін президент әкімшілігі өкілдігі мен президент істері басқармасы қызметкерлері жаңа ғимаратқа көшіп үлгергені көрсетілген. Сондай-ақ мемлекет басшысы Қасым-Жомарт Тоқаевтың жұмысына арналған арнайы кеңсе бар.