Алматыда халықаралық Meta Sport Forum басталды
Алматы қаласында Орталық Азияда спорт индустриясын дамыту мақсатында өтіп жатқан халықаралық Meta Sport Forum алғашқы күні өтті. Бұл туралы Stan.kz ақпарат агенттігі хабарлайды.
Фото: meta-ratings.kz
Халықаралық форум Орталық Азия елдерінде маркетинг бизнесін және спорт индустриясын дамыту мақсатында ұйымдастырылуда.
Іс-шараның алғашқы күнінде форумның қадірлі қонағы футболдан Бразилия құрамасының капитаны, екі дүркін әлем чемпионы Кафу қатысты. Экс-қорғаушы шара қатысушыларымен бір сағаттан аса сұрақ-жауап форматында ашық кездесу өткізді.
Сондай-ақ халықаралық форумда танымал испандық функционер, "Барселона" футбол клубының жобаларында жұмыс істеген Пако Латорре лекция өтті. Және қазақстандық спорт мамандары арасынан SPORT+ телеарнасының директоры Асхат Жақаев, Setanta Sports арналар желісінің еліміздегі маманы Арман Сәрсембаев “Қазақстандағы футбол трансляция бәсекесі” жайлы кеңінен қозғады.
Халықаралық іс-шара 3 сәуірге дейін жалғасады. Ертең Meta Sport Forum аясында Metaratings Top Awards марапаттауы өтеді. Бұл жарыста еліміздегі үздік спорт мамандары анықталатын болады.