7 кг мефедрон, 200 литр прекурсор: ҰҚК Алматыдағы есірткі зертханасының жолын кесті
Ұлттық қауіпсіздік комитетінің Алматы қаласы бойынша департаменті қалалық прокуратурамен синтетикалық есірткі өндіретін жасырын зертхана қызметінің жолын кесті. Бұл туралы Stan.kz ақпарат агенттігі хабарлайды.
Фото: Ұлттық қауіпсіздік комитеті
16 мамырда Алматыдағы жеке үйлердің бірінде психотроптық заттарды дайындайтын екі азамат қылмыс үстінде ұсталған.
"Тінту кезінде 7 келі мефедрон мен 200 литр прекурсорлар, сондай-ақ есірткі заттарын өндіруге арналған құрал-жабдықтар тәркіленді. Заңсыз бизнесте бұл есірткілердің бағасы 140 миллион теңгеден асады", – делінген ұлттық қауіпсіздік комитетінің баспасөз қызметінің хабарламасында.
Тергеу мәліметінше, ұсталғандар шетелдік интернет-дүкендердің бірінің мүддесі үшін “есірткі дайындаушы” болып жұмыс істеген.
Оларға қатысты Қылмыстық кодекстің 297-бабының 3-бөлігі “Есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу” бойынша сотқа дейінгі тергеу амалдары жүргізіліп жатыр.