11-қабаттан секіріп кеткен: Білім министрлігі Назарбаев Зияткерлік мектебі оқушысының өліміне қатысты түсінік берді
Білім және ғылым министрлігі балалардың құқықтарын қорғау комитеті Алматыда 11-қабаттан секіріп кеткен оқушыға қатысты оқиғаға түсінік берді, деп хабарлайды Stan.kz ақпарат агенттігі.
"Алматы қаласындағы Назарбаев Зияткерлік мектебінде қайғылы жағдайда қаза тапқан 7-сынып оқушысының ата-аналары мен жақындарына қайғыларына ортақтасып, көңіл айтамыз. Қазіргі уақытта әлеуметтік желілерде оқушының қайтыс болуына байланысты қарама-қайшы ақпарат тарап жатыр. Балалардың құқықтарын қорғау комитетінің өкілдері қаза тапқан оқушының ата-анасымен байланыста. Құқық қорғау органдарының қызметкерлері тергеу іс-шараларын жүргізуде. Тергеу мүддесі үшін жағдайдың егжей-тегжейі жария етілмейді", - делінген комитет хабарламасында.
Мәлім етілгендей, тергеу нәтижелері бойынша қажетті шаралар қабылданатын болады. Тергеу амалдарынан кейінгі ресми қорытындыны күту қажет.
"Ата-аналарды, мұғалімдер мен мектеп басшыларын балалармен қарым-қатынаста асқан мейірімділік танытуға шақырамыз. Өйткені балаларымыздың өмірі мен денсаулығы қоғамның басты құндылығы болып табылады", - делінген хабарламада.
Назарбаев Зияткерлік мектебіндегі оқушы өлімі: Марқұмның сыныптастары сабаққа белдемше киіп келген
Еске сала кетсек, 28 қазанда Алматыда химия-биология бағытындағы Назарбаев зияткерлік мектебінің оқушысы 11 қабаттан секіріп кеткен болатын.
Алматы қаласы химия-биология бағытындағы Назарбаев Зияткерлік мектебі әкімшілігінің мәліметінше, оқушы сабақтан тыс уақытта қаза болды. Қазіргі уақытта тергеу амалдары жүргізілуде.