Петропавлда түнгі клуб маңында 2 қызды қағып кеткен жүргізуші тұтқындалды

Петропавлда түнгі клубтың маңында екі қызды көлігімен қағып кеткен Илья Старухин тұтқындалды, деп хабарлайды СҚО полиция департаментінің баспасөз қызметіне сілтеме жасап Stan.kz.

Ведомство мәліметінше, 27 жастағы ер адам бұған дейін халықаралық іздеуге берілген. Ол қаладағы түнгі клуб маңында екі қызды қағып кетті деп күдіктеліп отыр.

«ҚР КК 345-бабы 3-бөлігі (Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы) және ҚР ҚК 347-бабы (Жол-көлік оқиғасы болған жерден кетіп қалу) бойынша сотқа дейінгі тергеу амалдары жүргізіліп жатыр. Қажетті бірқатар сараптамалар тағайындалды. Соның нәтижелері бойынша, сонымен қатар барлық қажетті тергеу әрекеттері жүргізілгеннен кейін, материал жан-жақты және объективті зерделенген соң қылмыстық іс өндіріспен аяқталатын болады», – делінеді хабарламада.

Қазіргі уақытта Старухин уақытша ұстау изоляторында отыр.