Өзбекстандағы Қызылқұм шөліне қалың қар жауды (фото)
Өзбекстанның орталығындағы Қызылқұм шөлінде қар қалың түсті. Бұл туралы Өзбекстанның табиғатты қорғау жөніндегі мемлекеттік комитеті хабарлады.
“Ауа-райы бұл күні республиканың көптеген аймақтарында суытты. Біршама облыстарда қардың көп жаууы әдеттегі құбылыс. Ал ең ыстық нүкте болып саналатын Қызылқұм шөліне осыншама көп қардың түсуі күтпеген жағдай”, – делінген комитеттің хабарламасында.
Осы аптада Өзбекстанда биылғы қыс бойына алғаш рет қар жауып, қытымыр аяз орнады. Жақын күндері елдің көптеген аймағында ауа температурасы -5-8 градусқа дейін төмендейді деп күтілуде. Ал күндіз 2-6 градус аралығында болмақ.
Қызылқұм жазығы 300 мың шаршы шақырым аумақты алып жатыр. Ол Өзбекстан, Қазақстан, Түркіменстан аумағымен шектесетін Әмудария мен Сырдария өзендері аралығында орналасқан.
Әдетте Қызылқұмға бар болғаны жыл сайын 100-200 миллиметр жауын-шашын жауады. Жазықтың барлық аумағында ешқандай су арнасы жоқ.