ІІД: Алматыдағы арнайы операция аяқталды
Алматы полициясы қаладағы жедел-іздестіру шарасының аяқталғанын хабарлады. Қылмыстық мәндегі ақпарат расталмаған.
Фото: newskaz.ru
“Жедел-іздестіру шарасы өз мәресіне жетті. Қылмыстық мәндегі ақпарат тексерілген болатын. Ол расталмады”, – делінген ІІД хабарламасында.
Бұған дейін, Гоголь-Зенков-Мақатаев-Абдуллин көшелерінде арнайы операция жүргізіліп жатқаны хабарланған еді. Аталмыш мекен-жайға қаруланған арнайы қызмет өкілдері келіп қоршауға алған. Сондай-ақ, “Рахат” кондитерлік фабрикасы аумағы да қоршалып, Көк базар есіктері жабылған болатын.
Ішкі істер департаменті бұл операцияның 18 шілде күнгі қанды оқиғамен байланысы бар-жоғы туралы ақпарат бермеді.
Еске сала кетсек, 18 шілде күні Алматыда ер адам полиция бөлімшесі мен ҰҚК департаменті ғимаратына шабуыл жасап, 6 адамды өлтіріп, бірнешеуін жаралаған болатын.
Талқылау