"Гуманитарлық көмекті видеоға түсірген": Петропавлдағы мешітте имамды соққыға жыққан белсенді 15 күнге қамалды (видео)
Петропавлдағы орталық мешітте имамға шабуыл жасаған жергілікті тұрғын 15 тәулікке қамалды. Бұл туралы Stan.kz ақпарат агенттігі хабарлайды.
Фото: Видеодан скрин
Ер адам су тасқынынан зардап шеккендерге гуманитарлық көмек таратып жатқанын телефон арқылы видеоға түсірген. Бұл жергілікті имамға ұнамай, Петропавл тұрғынына ескерту жасады. Ер адам сынға қатты жауап беріп, дін қызметкерін соққыға жыққан.
Шабуыл жасаған ер адамның есімі – Руслан. Бұл туралы әлеуметтік желіде тараған видеодан белгілі болды.
"Мен қоғам белсендісі болсам да мешіт гуманитарлық көмектің қалай бөлініп жатқанын көрсеткісі келмеді. Діни қызметкердің соңғы сөзі: "Мен қалай айтсам, олар сені солай соттайды". Мешіт саясиланып барады", – деді ер адам.
Видео авторы Русланның 15 тәулікке қамалғанын айтты.
"Мен гуманитарлық көмекті жеткізуге жеке қатысқан әрбір адам оның қайда кетіп жатқанын көруге және білуге құқылы деп есептеймін", - деді ол.
@info.petropavlovsk ♬ оригинальный звук - info.petropavlovsk
Солтүстік Қазақстан облысы полиция департаменті Stan.kz тілшісіне белсендінің қамауға алынғанын растады.
“Су тасқынынан зардап шеккендерге гуманитарлық көмек тарату пункттерінің бірінде Петропавл қаласы тұрғындарының арасында жанжал орын алды. Сол жерде жүрген 37 жастағы ер адам болып жатқанның барлығын ұялы телефонға видеоға түсіріп жатқан. Ал 30 жастағы басқа петропавлдық видеоға тоқтатуды өтінген. Түсірілім жүргізіп тұрған ер адам бас тартып, соққы жасаған. Осылайша ұсақ бұзақылыққа жол берген. Аталған факті бойынша әкімшілік материал жиналды. Құқық бұзушы жасаған бұзушылығымен келісті. 16 сәуір күні сот шешімімен оған 15 тәулікке әкімшілік қамаққа алу түріндегі жаза тағайындалды”, – делінген хабарламада.
Айта кетейік, бұған дейін Өзбекстандықтар су тасқынынан зардап шеккен қазақстандықтарға гуманитарлық көмек жіберетіні туралы жазған едік.