Соңғы жаңалықтар
Соңғы жаңалықтар

Діни басқарма Алматы облысында ислам дінін қабылдаған 82 жастағы молдаван әжейге үй сыйлады

Алладан сұрағанның екі бүйірі шығады.Өмір бойы тағдыр тауқыметін тартып, қартайғанда арманы орындалған қарияны қоныс тойымен Бас Муфтидің өзі келіп құттықтады, деп хабарлайды КТК.

Сексеннің сеңгіріне шыққан Галина Рогоза тағдырдың тауқыметін көп көрген жан. Асыраушысынан ерте айырылған кейуананың жалғыз қызы жаман ауруға душар болды. Немере қызынан көрген үш шөбересі бар, барлығы мына бір апатты үйде өлместің күнін кешкен. Бірақ қанша қиналса да қария бір Алладан үмітін үзген емес.

“Аллаға тәуба менің құлшылығымды қабыл еткен.  Мен молдаван қызымын. Осыдан жиырма жыл бұрын исламды қабылдадым. Қолымды бір құдай деп қана жайдым. Міне енді осынша жасқа жеткенде хан сарайындай үй салып беріп жатыр. Қол ұшын созған барлығына алғысым шексіз”, – дейді Галина Рогоза.

Бүгін Галина әжейдің әулетінде үлкен той. Су жаңа баспанаға құтты болсын айтып, шашу шашып келіп жатқандардың қарасы көп. Оларға арнайы дастархан да жайылған. Ауылда Мәриям апа атанып кеткен қарияны құттықтауға тіпті бас мүфтидің өзі арнайы келді.

“Біздің мүмкіншілігіміз шектеулі. Бірақ әйтседе теңізге құйған тамшыдан болса да көмек көрсетейік. Қолымыздан келген нәрсені жасайық деген нәрсені ұйымдастырып отырмыз. Болашақта осындай асыраушысы жоқ осындай азаматтарға үй салып беруді жалғастыра береміз”, – дейді Бас мүфти Ержан қажы Малғажыұлы.

Діни Басқарма жанындағы «Зекет» қорынан бөлінген қаражатқа Мәриям апаға үйді төрт-ақ айда салып берген. Үш бөлмелі баспананы тұрғызуға 6 миллион теңге кетіпті.

Тағы да оқыңыз:

БҚО-да жұмысшыларын балағаттаған ауыл әкімі қызметінен кетті

Алматылық дәрігерлер сүт қоспасының сәби өміріне қауіп төндіретінін айтып дабыл қақты

Маңғыстау облысының тұрғыны сыра сатпаған қыздың бетіне қайнап тұрған май шашып жіберген

Талқылау