Болашақта Қазақстан бірнеше бөлікке ыдырап, Ресейге қосылуға мәжбүр болады – Сарапшы

Ресейлік экономист Михаил Хазин Қазақстанның тағдыры туралы болжам айтты. Оның пікірінше, Қазақстанның болашақта ыдырап, Ресейдің айналасында бірігуден басқа амалы қалмайды. Бұл туралы Stan.kz ақпарат агенттігі хабарлайды.

Фото Михайл Хазиннің Telegram желісінен

Sputnik радиосында Хазин Қазақстанды әртүрлі элиталық топтар арасында өте үлкен ішкі шиеленісі бар осал ел деп санайтынын айтты. Оған дәлел ретінде 2022 жылғы қаңтардағы оқиғаны мысал етті. 

“Қазақ элитасындағы терең қайшылықтар ешқашан шешілмеген және жойылмаған. Егер елде кез келген күрт саяси өзгерістер болса, бұл түрлі топтардың жиналып қалған ашуының сыртқа шығуына, қарсыласуына әкеліп соғады”, – деді сарапшы.

Ол осыған байланысты Қазақстанда елдің бірнеше жекелеген бөліктерге ыдырау қаупі жоғары екенін түсіндірді.

Сонымен қатар Хазин қазақстандық басшылықтың Еуропамен сауда қатынастарын құру әрекеттерін де сынады. Оның пайымдауынша, бұл Қазақстан үшін сәтсіздікке әкеледі.

“Себебі болашақта еуроаймақта экономикалық дағдарыс болса, еуропалықтардың Қазақстан шикізатын сатып алуға ақшасы болмайды. Олар үшін өз тауарларын сата алатын жалғыз орын Ресей Федерациясы бастаған үлкен бірлестік болады”, – деп қосты Михаил Хазин.

• "Қазақстанда әйел болғанша, Түркияда мысық болған артық": Елде соңғы жайттарға байланысты шетелге көшіп кеткісі келетін жастар көбейген

• "Бұрынғы қазақ қоғамындағы әйелдің орны биік": Танымал этнограф ер-азаматтарды әйелді сыйлауға шақырды

Осылайша, ол Қазақстан мен Армения Ресеймен тығыз ынтымақтастықты бастайтынын болжады.

Хазиннің айтуынша, жаңа жаһандық экономикалық дағдарыстың басталуы бұрынғы кеңестік республикаларға Ресейдің жаңартылған одағына бірігуінен басқа таңдау қалдырмайды. Тіпті Владимир Путин мұны бұрыннан болжап, 2015 жылы Еуразиялық экономикалық одақты құрған.

Сарапшының пікірінше, енді бұл алаң, ресейлік ТМД-ның барлық елдерін біріктіруі керек. Егер бәрі жоспар бойынша жүрсе, болашақта ЕАЭО толыққанды валюта аймағына айналып, Ресей оның орталығында болады.