Азиада: Қазақстандық спортшылар бүгінгі күнді қос алтынмен бастады

Қазақстан құрамасының спортшылары Саппоро қаласында өтіп жатқан қысқы Азиа ойындарында бір алтын және екі күміс медаль жеңіп алды.

Фото: ҚазАқпарат

Бұл туралы Vesti.kz хабарлайды.

Алтын медальді қоржынға биатлоншы Ян Савицкий салды. Ол 10 шақырымға спринттен жарыста үздік болды. Екінші болып мәреге тағы бір қазақстандық Василий Подкорытов келді. Ол күміс медаль еншіледі.

Савицкий бір рет қана мүлт кетіп, қашықтықты 26 минут 59,2 секунд көрсеткішпен жүріп өтті. Ал Подкорытов екі рет мүлт кетіп, 15 секундқа кешігіп келді.

Тағы бір күміс медальді шаңғышы Елена Коломина бес шақырымға классикалық стильде жүгіруден жеңіп алды. Коломина қашықтықты 15:02.8 минут көрсеткішімен келіп, Жапония спортшысы Юки Кабаяшиден 6,7 секундқа қалып қойды. Ал қола медаль Қытай өкіліне бұйырды.

Айта кетейік, Коломина бұл жарыста осымен үшінші медальді алып отыр. Бұған дейін ол 1,4 шақырымға классикалық стильде жүгіруден күміс, ал 10 шақырымға еркін стильде жүгіруден қола медаль жеңіп алған еді.

Сондай-ақ, қазақстандық биатлоншы Галина Вишневская Саппоро қаласында өтіп жатқан Азиадада 7,5 шақырым қашықтықта спринтерлік жарыстан алтын медаль жеңіп алды.

Вишневская 20:32.6 минут көрсеткішпен бірінші келсе, екінші болып одан 24.2 секундқа қалып қойған қытайлық спортшы келді, үшінші орынды тағы бір қазақстандық Алина Райкова алды. Ол отандасынан 50.6 секундқа қалып қойды.

Осылайша, қазіргі уақытта Қазақстан қоржынында үш алтын медаль бар. Одан бөлек – тағы төрт күміс және бес қола медаль.