Алматыдағы арнайы операция: “Рахат” фабрикасы аумағы қоршауға алынып, Көк базар жабылды

Алматыдағы арнайы операция аясында “Рахат” фабрикасының аумағы қоршалды, жақын маңдағы үйлердің тұрғындары эвакуацияланып жатыр.

Алматыда “Рахат” кондитерлік фабрикасы аумағын полиция мен Қарулы күштер қызметкерлері қоршап алды. Мақатаев көшесіндегі автокөлік қозғалысы тоқтатылды.

Куәгерлердің айтуынша сол жерде жедел жәрдемнің бірнеше бригадасы, газ қызметкерлері мен құтқару қызметі жұмыс істеуде. Аталған аумақта көлік қозғалысы қиындады.

Кондитерлік фабрика штатты режимге көшкен. Ал Көк базардың барлық қақпалары жабылған. Ал базарға кіріп үлгерген қызметкерлер мен келушілер іште қала беруде.

Бұған дейін Алматы орталығында арнайы операцияның жүріп жатқаны хабарланған еді.