Алматы облысында мектеп директоры 20 мың теңге пара алғаны үшін сотталды
Алматы облысы Іле ауданында Боралдай кентінің №17 орта мектебінің бұрынғы директоры М. Шакароваға қатысты қылмыстық іс қаралды.
Бұл туралы ҚР Жоғарғы соты баспасөз қызметі хабарлайды.
Қылмыстық іс материалдарына сәйкес М. Шакарованы 20 000 теңге пара алғаны үшін ҚР мемлекеттік қызмет істері және сыбайлас жемқорлыққа қарсы іс-әрекет агенттігі департаментінің қызметкерлері ұстады.
М. Шакарова параны қызметтік міндетін өрескел бұзған мектеп оқытушысын жұмыстан шығармау үшін алған.
Сот үкімімен М. Шакарова ҚК 366-бабы 1-бөлігі (пара алу) бойынша айыпты деп танылды. Оған параның елу есе құнын (1 000 000) төлеу түрінде жаза тағайындалды. Сондай-ақ оған тиесілі мүліктер тәркіленіп, ол өмір бойынша мемлекеттік органдарда, жергілікті өзін-өзі басқару органдарында болу немесе әкімшілік-шаруашылық функцияларды орындаумен байланысты лауазымды қызметті атқару құқығынан айырылды.
Үкім заңды күшіне енген жоқ.