Мамандар Қазақстандағы су тасқыны егінге кері әсерін тигізеді деп есептейді. Су топырақтың барлық құнарлы қабатын шайып кетті. Ал септиктер мен мал қорымдарының эрозиясы егістіктерге ауру қоздырғыштарын әкелуі мүмкін. Сорақысы – жазда қуаңшылық күтіп тұр.

"Жыл сайын жылыну процесі күшейе түседі. Ал көктемде суға батып қалсақ, жазда су болмайды. Ал енді осы еріген судың барлығын жинау үшін суару арналарын, резервуарлары бар каналдарды, су ағызатын каналдарды салу керек”, – деді "Kaz Eco Patrol" қоғамдық бірлестігінің жетекшісі Тимур Елеусізов.

Мамандар көбірек су қоймаларын салуды немесе суды сақтау үшін шұңқырлар жасауды ұсынады. Оны егін суаруға, балық өсіруге пайдалануға болады.

“Бір жыл ішіндегі плюс және минус температуралардың қосындысы бір-бірімен теңестіріледі, жауын-шашынның қосындысы және осы жауын-шашынның кіріс және шығыс қосындысы да теңестіріледі. Демек су басқан кезде немесе бір жерде қатты жауын жауса, артынша құрғақ жел, құрғақ ауа райы болады дегенді білдіреді”, – деп мәлімдеді "Су хабы" халықаралық зерттеу орталығының директоры Анатолий Рябцев.

"Қазгидромет" күзгі далалық зерттеудің қорытындысын жариялады. Ақмола облысында және Қазақстанның басым бөлігінде топырақ қанағаттанарлықтай ылғалды, егін жақсы болады деген болжам бар.

“Ақмола облысының басым бөлігінде маусым айында орташа ауа температурасы нормадан жоғары болады деген болжам бар. Шілде және тамыз айларындағы болжам бойынша ауа температурасы нормаға жақын, шілдеде жауын-шашын нормадан жоғары, тамызда нормаға жақын болады”, – дейді жетекші инженер-агрометеоролог Қантаева Айгүл.

Дегенмен болжам тағы жаңартылады.

Айта кетсек, еліміздің 8 өңірінде су тасқынының беті қайтар емес. Тасқын салдарынан қауіпсіз жерге көшірілген тұрғындар саны 100 мыңнан асты.

Талқылау