Соңғы бір жылда сәбилі болған жұлдыздар (фото)
Соңғы бір айдың ішінде отандық шоу-бизнесте бірнеше жұп сәбилі болды. Айдана Меденованың сәбилі болғанын білген жұрт таңырқап қалды. Себебі әнші жүктілігін жасырып келді. Ал Қыдырәлі мен Қарақаттың қызды болуын бүкіл ел күткендей болды. Мұрат Қожаның да жас келіншегі қыз босанып, елді бір шулатты.
Осы орайда Stan.kz соңғы бір жылда ата-ана атанған танымал жұлдыздар тізімін ұсынады.
Жасы 30-дан асқанда тұрмысқа шыққан Мөлдір Әуелбекова өткен жылдың қараша айында тұңғышын дүниеге әкелді. Әкесі Арыстан ұлына Салтай деп есім берді.
Сол сияқты Арман мен Ашаның отбасы 2016 жылдың қазан айында Асылым есімді арумен толықты.
Қараша айында еліміздегі ең сұлу актрисалардың бірі Әлия Телебарисова да тұңғышын құшағына алды. Әлия мен оның жары Азамат қыз баланың ата-анасы атанды.
Араға бірнеше күн салып, «Келінка Сәбина» фильмінде басты рөлдердің бірін сомдаған актриса Айнұр Ілиясова қыз босанды.
2017 жыл Айдар Байжанов үшін сәтті басталды. Әнші қақаған қыс ортасында қыз баланың әкесі атанды.
Мамыражай мамырдың алғашқы күндерінде Мұрат Қожа төртінші рет әке атанды. Әншінің жас келіншегі Әйгерім қыз босанды.
Өмірге асықтай төрт ұл алып келген Қарақат арманына қол жеткізіп, жары Қыдырәліге қыз сыйлады. Мамыр айында дүние есігін ашқан ханшайымға азан шақырылып Аяла деп ат қойылды.
30 мамыр күні КешYou тобының экс-әншісі Айдана Меденова екінші рет ана атанып, тыңдармандарының таңданысын туғызды. Себебі олар әншінің жүктілігінен бейхабар еді.
Жұлдызды ата-аналар тізбегін бір жыл бойы елді шулатқан актер Дәурен Айдарқұлов пен әнші Ақбота Сейтмағамбет аяқтайды. Естеріңізде болса, маусымның 1 күні Ақботаның дүниеге ұл алып келгенін хабарлаған болатынбыз.
