Агенттік төрағасы Асхат Жұмағали маусымаралық кезеңде үкімет әлеуметтік маңызы бар азық-түлік өнімдерінің бағасын ұстап тұруға және тұрақтандыруға бағытталған бірқатар шаралар қабылдап жатқанын атап өтті. Бұл мәселе, әсіресе, су тасқынынан зардап шеккен аймақтар үшін өзекті.

Атап айтқанда, Өзбекстан мен Тәжікстаннан ауыл шаруашылығы тауарларын тікелей жеткізу мүмкіндіктері пысықталды. Тауарлар тікелей қазақстандық нарыққа делдалсыз және алып сатушыларсыз неғұрлым қолжетімді бағамен жеткізіледі.

Осыған байланысты Асхат Жұмағали аумақтық бөлімшелерге жемқорлық әрекеті мен көріністерін болдырмау мақсатында процестерге мониторинг жүргізуді тапсырды.

Сыбайлас жемқорлыққа қарсы қызмет органдары кез келген жемқорлыққа қатысты құқық бұзушылықтардың, оның ішінде заңсыз пайда табуға бағытталған түрлі құқыққа қарсы схемалардың жолын кеседі.

Баға белгілеуге теріс әсер ететін жемқорлық факторларға, оның ішінде тараптардың үлестестігіне, мемлекеттік аппарат тарапынан негізсіз әкімшілік кедергілер құруға, жосықсыз қатысушылардың айла-шарғы жасауына және теріс пайдалануға ерекше назар аударылады.

Сыбайлас жемқорлыққа қарсы қызмет басшысы бұл жұмыстың маңызын атап өтіп, осы мәселелерді ерекше бақылауда ұстауды тапсырды.

Бұған дейін Қазақстанда әлеуметтік маңызы бар азық түлік өнімдерінің бағасы төмендей бастағаны хабарланған.

Сауда және интеграция министрлігінің мәліметінше, кейінгі бір жарым жылда алғаш рет әлеуметтік азық-түлік тауарлары бағасының апталық индексінің төмендеуі тіркелді. 2023 жылдың алғашқы алты айында ӘМАТ бағасының индексі 4,2% болды, бұл 2022 жылдың сәйкес кезеңінен 4 есе аз.

Талқылау