Олимпиада тарихында алғаш рет әйел боксшыға Вэл Баркер кубогы табыс етілді

Атақты америкалық боксшы, екі мәрте олимпиада чемпионы Кларесса Шилдске Вэл Баркер кубогы табыс етілді.

Фото: tass.ru

Бұл туралы ҚазАқпарат хабарлайды.

Олимпиада тарихында Вэл Баркер кубогы алғаш рет әйел боксшыға беріліп отыр. Ең үздік техникасы үшін осындай биік марапатты иеленген 21 жасар Шилдс бұдан төрт жыл бұрын Лондонда бірінші рет үздік шыққан еді. Онда бокстан қазақстандық қыздар арасында тұңғыш рет олимпиада жүлдегері атанған Марина Вольнованың жолын жартылай финалда дәл осы Кларесса Шилдс кескен еді. Риода дәл осы жағдай қайталанып, Дариға Шәкімова 75 кг салмақта Кларесса Шилдске жол берді.

Ерлер арасында Вэл Баркер кубогы өзбекстандық Хасанбай Дусматовқа берілді. Ол алтын жүлдеге барар жолда қазақстандық Біржан Жақыповты да жеңген болатын.

Айта кетейік, Вэл Баркер кубогы үздік боксшыға 1936 жылдан бері тапсырылып келеді. Бұған дейін Қазақстаннан Василий Жиров (1996), Бақтияр Артаев (2004) және Серік Сәпиев (2012) Вэл Баркер кубогын иеленген болатын. Бұл жөнінен Қазақстан АҚШ боксшыларынан кейін (оларда 5 кубок бар) екінші орында тұр.