Қырғызстанда 29 тамыз аза тұту күні деп жарияланды
Президент Алмазбек Атамбаевтың жарлығымен 2016 жылдың 29 тамызы Қырғызстан Республикасында аза тұту күні болып жарияланды.
Бұл туралы kyrtag.kg хабарлады.
“2016 жылдың 27 тамызында қос бірдей қайғылы оқиға болды. Қырғызстан Республикасының 14 азаматы Ресей Федерациясының Мәскеу қаласындағы өрттен қаза тапты. Бішкек-Ош автожолындағы жол апаты 9 отандасымыздың өмірін жалмады”, – делінген жарлық мәтінінде.
“Бұл Қырғызстан халқы үшін ауыр қаза. Қырғызстан Республикасының мемлекеттік органдары қаза болғандар мен зардап шеккендердің отбасына қолдау көрсетеді. Адамдардың опат болу себептерінің әділ тергелуін қамтамасыз ету жұмысы, оның ішінде Ресей Федерациясының мемлекеттік органдарымен келіссөздер жүргізілуде”, – деп атап өтті президент.
Алмазбек Атамбаев қазаға ұшырағандарды аза тұтып, олардың туыстары мен жақындарына қайғырып көңіл айта отырып, 2016 жылдың 29 тамызын Қырғызстан Республикасында аза тұту күні деп жариялады.
Аза тұту күні Қырғызстан Республикасы аумағында, сондай-ақ шетелдегі дипломатиялық және консульдық өкілдіктер ғимараттарындағы мемлекеттік тулар төмен түсіріледі. Ойын-сауық шаралары тоқтатылады.
Еске сала кетсек, Мәскеуде болған өрт кезінде 17 қырғыз азаматшасы қаза тапқан еді. Олардың денесі бүгін Мәскеу-Ош-Бішкек бағытында Қырғызстанға жеткізілмек.