Көкпардан Қазақстан құрамасының ойыншысы ауыр жарақат алды (фото)

Қырғызстанда өтіп жатқан ІІ Дүниежүзілік көшпенділер ойындарында көкпардан ақтық сайыста Қазақстан мен Қырғызстан командалары күш сынасты.

Бұл туралы bnews.kz хабарлайды.

Додада қазақ спортшысы Əбдуғали Əбжапаров ат астында қалып, ауыр жарақат алды. Медициналық қызмет өкілдері қазақ спортшысын ауруханаға алып кеткен.

Көкпар тарту кезінде ол жерге құлап, аттардың астында тапталып қалған. Алғашқы дәрігерлік көмектен соң, ол ойын соңына дейін сол жерде қалуды сұраған.

Алайда біршама уақыттан соң жағдайы қайтадан нашарлап, дәрігерлер ойыншыны алып кетуге мәжбүр болған.

Ал финалдық бұл кездесуде Қазақстан құрамасы Қырғыздардан 15:3 есебімен ұтылып, күмісті қанағат тұтты.

Естеріңізге сала кетейік, Қырғызстанның Чолпан Ата қаласында ІІ Дүниежүзілік көшпенділер ойыны өтіп жатыр. Жаһандық жарысқа 58-ден астам елден 600-ге тарта спортшы қатысып жатыр. Олар 23 спорт түрінен бақ сынайды. Бұл сайыста ел намысын 75 спортшы қорғайды