Ет асып, құрт-май жеп, айран ішу өлімге апаруы мүмкін: Халықаралық денсаулық сақтау басқармасы осындай қорытынды жасады
Ет асып, құрт-май жеп, айран ішу өлімге апаруы мүмкін. Халықаралық денсаулық сақтау басқармасы зерттеу жасап, осындай байламға келіпті. Оған себеп, бұл тағамдардың құрамында тұз шамадан тыс көп екен.
Ата-бабамыздан бері келе жатқан азықтың қандай жазығы бар? Бұл туралы Евразия арнасына сілтеп Stan.kz хабарлайды.
Ғалымдардың пайымы мен зерттеуін оқыған біраз оқырман абдырап қалғаны рас. "Құдай-ау, күндеп жеп жүргеніміз қалайша ауруға душар қылады?" деп таңғалып жатыр. Бүлкілдетіп қайнатып, көбігін сүзіп алып дастарханға қоятын ет, қайнатып кептіретін құрт, қымыз бен шұбаттың пайдасын Сәлиха әже бір кісідей жақсы біледі. Тіпті, "жоғарыда аталғандардың пайдасы көл-көсір" дейді.
"Жақын жолдасым құрт ауруы яғни онкологиялық ауруға ұшырағанын білемін. Бір жылдан асты, медициналық көмекпен қатар, аурудың 1-2 сатысы болуы керек сүт тағамдарын уақытылы пайдаланып отыр. Мысалы оның ішінде жылқы, түйе сүті, саумалы. Міне осының бәрін уақытылы пайдаланып отырса осы бір жылдан асты өңін берген жоқ", - деді қала тұрғыны Сәлиха Аманғалиева.
Кей мамандар мұндай зерттеулер қазақтың ұлттық кодын өшіріп, адал астың орнына арзан, пайдасыз фаст-фудты тықпалау үшін жасалып жатқан қадам деп баға беруде. Академик Оразақ Смағұлұлы бабалардан бері келе жатқан тағамнан алшақтау үлкен қателік екенін айтады.
"Жасын ұзарту үшін, дұрыс күрес жасау үшін бірінші ұлттық тамаққа көшу керек. Ата-бабалар ішкен тамаққа. Қазақтың денесінде генетикалық тұрғыдан ет мәселесі бірінші орында тұр. Біз оны қалаймыз ба, қаламаймыз ба осыған бейімділігіміз, табиғи талабымыз өте орынды. Сол сияқты сүт-айранға да, ата-бабалардың тамағы сияқты", - дейді ҚР ҰҒА академигі Оразақ Смағұлұлы.
Халықаралық денсаулық сақтау ұйымының пайымына қайта оралсақ. Олардың айтуына қарағанда ет пен құрттың тым тұзды болуы дәстүрмен қалыптасқан дүние екен. Сонау тоңазытқыш жоқ заманның әдеті әлі жалғасып келе жатқан көрінеді. Сәуле Кенжеғалиқызы шетелдік әріптестерінің мұндай қорытындысы астарсыз емес екенін растады.
"Адам ағзасына қатты әсер етуі салдарынан созылмалы ауруларға әкеледі. Ол көбіне айтып жатқандай гастрит аурулары, жараның пайда болуы асқазанда. Көбіне гипертония, қан қысымының көтерілуі әкеліп соқтырады. Тұздың көбеюі организмде көп өзгеріске ұшыратады. Соның кесірінен аурулар пайда болады", деді дәріге Сәуле Кенжеғалиқызы.
Ескерту міндет, әрі қарай не істеп, қандай шешім қабылдау әр адамның өзіне байланысты екенін жақсы білесіздер. Қысқасы, тамақтың тұзын асырып ішіп-жеудің соңы жақсылыққа апармайды екен. Сондықтан не нәрсенің болсын өлшемі бар екенін естен шығармаған абзал.