Екі адамды құтқарған Өскемен тұрғыны елге жария болмау үшін есімін жасырып қалды

Өскеменде ер адам екі жасөспірімді өрттен аман алып шықты.

Төтенше жағдайлар қызметі қала тұрғынының батыл іс-әрекеті туралы кездейсоқ білген, деп хабарлайды Аltaynews.kz сайты.

Ақпанның 3-інен 4-іне қараған түні Ертіс көшесінің бойындағы жер үйлердің бірінде өрт шыққан. Құтқарушылар оқиға орнына жеткен кезде үйдің шатыры түгелімен отқа оранып жатты. 25 шаршы аумақты шарпыған жалын жарты сағаттың ішінде ауыздықталды. Кейін оқиғаға куә болғандар белгісіз ер адам ысты газға уланған 2003 және 2002 жылы туған екі жасөспірімді үйден алып шыққанын айтқан. Оларды құтқарған Игорь есімді көршілері болып шықты. Ол балаларды үйден көтеріп алып шығып, жедел жәрдем дәрігерлеріне тапсырған.

Тергеудің алдын ала нұсқасы бойынша, масайып алған екі дос туыстарынан үйдің кілтін ұрлап алған. Ішімдік ішулерін сонда жалғастырған олар өрттің шығуына себеп болған. Егер көршілері болмаса екеуінің аман қалуы екі-талай еді. Бірақ Игорь өзінің әрекетін батырлыққа баламайды. «Мен құтқарушы емеспін ғой – мұны жасауға тиіс едім. Бұл туралы өзгелерге айтып, мақтануды жөн санамаймын», – деді ол өзінің тегін атамауды өтініп.

Тағы да оқыңыз:

Астана тұрғыны ұлына Қанат-Ислам деген есім берді

Дубайда тұратын қазақ қызы: Бұл елде инвестицияға үй алып жатқан қазақстандықтар өте көп

Қазақстандық қызға үйленген африкалық азамат: Қазақстан – менің бақыт мекенім