«Ата заңды құрметтеу, бұлжытпай орындау – алға қойылған биік мақсаттарға қол жеткізудің алғышарты. Конституциялық кеңестің қызметі азаматтар құқықтарын қамтамасыз ететін, жалпы мемлекеттік құндылықтарды сақтайтын ізгі мақсатын қорғауға бағытталған. Жолдау жарияланғаннан бергі кезең Қазақстанның мемлекеттілігі мен конституциялық бірегейлігі үшін тарихи таңбалы оқиғалармен ерекшеленеді. Салиқалы халқымыздың сабырымен, биліктің сайлану салтымен Қазақстанда билік ауысты.

Мемлекет басшысы өкілеттігінің көшуі, конституцияға өзгерістер енгізу және республика президентінің кезектен тыс сайлауы конституцияның талаптарына қатаң сәйкестікте өтті. Осылайша тәуелсіздік басында Елбасы мәлімдеген және тұрақты түрде қамтамасыз етіліп отырған Ата Заңның рухын адал сақтау бағытының сабақтастығы және оған қатысты қоғам мен мемлекеттің бұлжымастығы қайта расталды», - деді Қайрат Мәми.

Әрі қарай ол конституциялық кеңес төрағасы мемлекеттілік дамуының жаңа дәуірінің мемлекеттің және азаматтың ең басты міндеті - конституцияның ережелері мен нормаларын құрметтеу және жүзеге асыру екенін ерекше атап өтті.

«Конституциялық бақылау органының жолдауында конституциялық кеңестің қорытынды шешімдерін орындауда жағымды үрдістер байқалады. Мысалы, оның құқықтық ұстанымдарын іске асыру үшін жыл басында заңнамада мемлекет мұқтажы үшін мүліктен күштеп айыру кезінде оның құнын бұрынғы кадастырлық немесе шартты емес, нарықтық бағасы бойынша жүзеге асырылатыны бекітілді.

Атқарушылық іс жүргізуде күштеп әкелуді қолдану тәртібі егжей-тегжейлі реттеліп, оны қолдану процесінде мемлекеттік органдар өкілеттіктерінің ара-жігі ажыратылды. Халықаралық стандарттарға сәйкес, азаматтарды азаптаудан, зорлық-зомбылықтан, басқа да қатыгездік немесе адамдық қадір-қасиетін қорлайтындай жәбір көрсету тетіктері күшейтілді.

Әкімшілік рәсімдік-процестік кодекстің, халықтың көші-қон саласындағы қоғамдық қатынастарды реттейтін заң жобалары, сондай-ақ, норма шығармашылық процесті жетілдіруге, заңнаманы жүйелеуге және құқық қолдануды жақсартуға бағытталған іс-шаралар әзірленді. Заңнамалық актілерде бір-біріне қайшы келетін және азаматтардың құқықтары мен бостандықтарын бұзуға жағдай жасайтын ережелерді алып тастау бойынша жұмыс жалғасуда», - деді ол.

Мұнымен қатар, ол конституциялық іс жүргізу практикасын және заңнаманы дамытудың қазіргі заманғы трендтерін талдауды ескере отырып, конституциялық кеңес елімізде құқық мемлекет қағидаттарын нығайту бойынша нақты ұсыныстар енгізді. Конституциялық кеңес заңнамалық массивті конституцияландыру деңгейін арттыру қажет деп пайымдады.

Естеріңізге сала кетсек, бүгін парламент қос палатасының бірлескен отырысы өтіп жатыр. Отырысқа сенат пен мәжіліс депутаттары, үкімет басшысы Асқар Мәмин, есеп комитетінің төрағасы Наталья Годунова қатысып жатыр.

ҚР парламент палаталары бірлескен отырысының күн тәртібінде келесі мәселелелер қаралады:

1. Қазақстан Респбуликасы конституциялық кеңесінің «Қазақстан Республикасындағы конституциялық заңдылықтың жай-күйі туралы» жолдауы жөнінде;

2. Қазақстан Республикасы үкіметінің және республикалық бюджеттің атқарылуын бақылау жөніндегі есеп комитетінің 2018 жылғы республикалық бюджеттің атқарылуы туралы есептері жөнінде.

Осыған дейін ҚР парламенті мәжілісінің төрағасы Нұрлан Нығматулин 20 маусым күні қос палатаның бірлескен отырысын шақыру туралы өкімге қол қойған болатын.

Қазақстандағы Конституция күні: Бұл қандай мереке және оны қашан тойлайды

Талқылау