Бекболат Тілеухан сұхбат барысында қоғам мәселесі жайында, өзі мен отбасыы жайлы айтып өтті. Айтуынша, бүгінде өзін жақтаушылардан гөрі, даттаушылар саны көп.

“20-ғасырда қоғамды тексіздендіру саясаты жүрді. Көзі ашық адамдарды, оқу-жазуды үйреткендерді қырып тастады. Олардың орнын шолақ белсенділер, жала жапқандар басты. Олардан ұрпақ тарап, қазір желіде пікір жазып отыр”, – дейді Бекболат Тілеухан.

Айтуынша, қоғам санасын өзгерту мүмкін емес. Мәжіліс депутаты айтқан сынынан соң білім министрінің оң сабақ алғанын, келеңсіздіктердің түзеліп келе жатқанын баяндады.

“Ерлан Сағадиев бастапқыда қазіргі оқу жүйесін өзі де түсінген жоқ. Ал, қазір сыннан кейін көп өзгеріс бар. Көп жұмыс жасалды. Сағадиев сыннан кейін сол мәселені түзейтін адам. Енді сол кісі қызметінен кетіп қалмаса, ісін аяғына дейін жеткізсе деп тілеп отырмын”, – деді депутат.

Бекболат Тілеухан өзін қаралап жазатындарды әлдекімдер қаржыландырып отыр деген пікір айтты.

“Бірде бұрын араласып жүрген, Европада оқып келген жігіт менімен кездескісі келді. Кездесуде мен туралы қаралап жазу туралы тапсырыс түскенін, сол үшін ақша төлейтінін айтты. Алайда жазуға қолы бармай отырғанын жеткізді. Бірақ ақшаның да қажет екенін айтып, менен ақша төлей алу мүмкіндігім жайлы сұрады. Мен ақша төлесем, мен туралы жаман нәрселер жазбайды екен. Бұл адамшылық па?”, – дейді депутат.

Бекболат Тілеухан көрермен сұрақтарына жауап бере, екі баласының Америкада оқып келгенін, бауырының Болгарияда бизнесі барын айтты.

“Мен демалыс орнының иесі емеспін, бірақ қатысым бар. Болгарияда бауырымның демалыс орны бар. Бірақ оның табысына араласпаймын. Адамдарымды кез келген уақытта сонда апарып қыдырта алам. Өзімнің ел айтып жүргендей 100 жылқым жоқ. Бір үйір жылқым бар. 11 құлынды бием бар”, – дейді мәжіліс депутаты.

Stan.kz сайтын Telegram арқылы оқыңыз. Арнамызға жазылыңыз.

Талқылау