Бәріміз бір бөлмеде жатырмыз: Түркістан облысында мемлекеттен пәтер алған отбасылар шу шығарды

Тұрмысы төмен отбасылар мен жетім-жесірлерге деп бөлінген пәтерлерде жұрт бүрсең қағып отыр. Үйді жылытамыз деп қосымша электр пешін қосқаны үшін ай сайын жарыққа 15 мың теңгеден төлейді екен. Оның өзінде жеке есеп-шот арқылы емес, қолдан жазып берген қағазбен төлем жүргізуге мәжбүрміз дейді жұрт. Ал мәселенің түйінін тарқатуға тиіс әкімдік болса, бар кінәні тұрғындардың өзіндеріне жауып отыр.

Бұл туралы Еуразия бірінші арнасы хабарлайды.

Екінші топтағы мүгедек Гүлжан Батылбекованың сегіз жыл кезекте тұрып әрең алған пәтері көңіл көншітпей тұр. Үш бөлмелі баспананың тек біреуі мен ас үйінде ғана жылу бар. Оның өзінде де мардымсыз. Күн суытқан кезде екі баласымен бірге аядай бөлмеге тығылады екен.

Жылу мен суықтың арасын бір ғана қабырға бөліп тұр. Суықтан бүрсеңдеген тұрғындар бір бөлмеде ғана тұруға мәжбүр.

«Екі бөлме де сондай. Амалсыз, бір бөлмеде жатырмыз бәріміз», – дейді Кентау қаласының тұрғыны Гүлжан Батылбекова.

Кентау қаласындағы Құралбаев және Әли Бекенов көшесі бойындағы бес қабатты екі тұрғын үйді облыс әкімі өткен жылы Тұңғыш Президент күні пайдалануға берген-тін. Аймақ басшысының қолынан пәтер кілтін көптен бері кезекте тұрған әлеуметтік жағынан аз қамтылған отбасылар мен жетім жесірлер, мүгедектер және бюджеттік мекеме қызметкерлері алған еді. Алайда, баспана иелерінің қуанышы осы күні су сепкендей басылып қалған. Көпшілігі пәтерге әлі күнге тіркеле алмай жүр. Ай сайын әр отбасы он бес мың теңге жалға алғаны үшін және осыншама ақшаны электр энергиясын пайдаланғаны үшін төлеуге мәжбүрміз дейді. Себебі, жеке есеп-шот ашуға әкімдік рұқсат етпей жатқан көрінеді. Жылудың жыры өз алдына бөлек әңгіме.

«Келісімшартта әр шаршы метрі 200 теңгеден деп көрсетілген адам басына деп. Барлығы 15000 теңге төлейсіздер дейді. Сонда біз 10 жыл күткенде 15 мыңнан төлеп, біз ақшамызды қай жағына жеткіземіз, өзіміз асыраушысынан айырылған адам болсақ», – дейді Кентау қаласының тұрғыны Айман Жүзтаева.

«Мысалы, біз айдың бірінші күнінде келдік, сонда 12 күннің ішінде менің 650 кВт жағуым мүмкін емес. Қанша рет «Аристон» қоссам да», – дейді Кентау қаласының тұрғыны Гуля Маханбетова.

Тұрғындардың сөзінше, үйдің сапасы әлден сыр бере бастаған. Шатырдан су сорғалап, жоғары қабаттағы су жаңа пәтерлер бүліне бастады дейді.

«Өзімнің 5-ші қабатымнан су өтіп жатыр, мен өз көзіммен көрдім. Зал мен ас бөлмемде жылу жоқ», – дейді Кентау қаласының тұрғыны Мансұр Айтілеуов.

Дегенмен, бұл мәселені жергілікті билік өз назарымызда ұстап отырмыз деп сендірді. Шенеуніктің сөзінше, пайдалануға берілген 110 пәтердің әлі тең жартысы келісім-шарт үлгісін алмағандар екен. Екі жақты құжатқа сәйкес, пәтер иесі мен отбасы мүшелері жақын күндері сол үйге тіркеуге алынады.

«Қазір біз ол кісілерге келісімшарттарын бергенбіз. Келісімшартта қанша адам тіркеліп тұр, 7-8 адам ба, сол келісімшартпен “Кентаужарық” мекемесіне барады, сол мекемемен келісімшарт түзген кезде ай сайынғы төлейтін қаржысы азаяды. Олар қазір осы қаңтар айынан бастап сол жұмыстарды жүргізіп жатыр», – дейді Кентау қаласы әкімінің кеңесшісі Асхат Әбдірәсілов.

Тағы бір ақпарат, үміт пен күдіктің арасында жүрген тұрғындар болашақта пәтерді өз аттарына рәсімдеуге мүмкіндік бар екен. Ол үшін ай сайын баспана қаражатын уақытылы төлеп тұрса болғаны. Ал, электр энергиясының шамадан тыс қымбат екенін жергілікті билік анықтаймыз деп уәде берді.