Апаттан көз жұмған бағдарламашы жігіттің қабіріне iPhone-құлпытас қойылды
Алматыда жол апатынан қайтыс болған бағдарламашы жігіт Заңғар Орынбетовтің қабіріне iPhone бейнесіндегі құлпытас қойылды. Бұл туралы ҚазАқпарат хабарлайды.
Әлеуметтік желіде бұл жағдай сын да тудырған еді. Алайда жігіттің туыстары айтылған сынға орынды жауап берді.
Онда туыстары Заңғардың iOS-әзірлеушілердің бүкіләлемдік конференциясына қатысқан жалғыз қазақ азаматы екенін, оның осы салада әлемді таңдандырар біраз жобалары болғанын айтады.
23 жастағы жігіт 12 қыркүйек күні Приозерскте жол апатынан мерт болды.
“Заңғар IOs жүйесіне арнап мобильді қосымшалар жасайтын. Apple компаниясын жақсы көретін. Өз жұмысының көпшілігін де соған арнады. Жазда Apple компаниясының WWDC 2016 жазғы мектебіне жолдама алып, барып қайтқан. Соңғы жұмысы iPhone/iPad-қа арналған қазақша интеллектуалды пернетақта еді. Өмірден ең жақын адамың кеткенде оның оралмасын түйсінсең де, бұрынғыдай қуантқың келеді. Заңғардың басындағы құлпытасы – әкесі мен анасының соңғы “сыйлығы”, – деп жазды Заңғардың әпкесі Белла Орынбетова Фейсбук желісінде.