-Даудың басы ат шаптырым аумақты алып жатқан мына жер. 153 гектар аумақ қалаға өткелі кенеттен жаңа иелері пайда болыпты. Содан бері тұрғындардан әбден маза қашқан.

««Ақ бата» деген компания кейіннен шықты. 2014-те осы жерді тартып алды. Ол «Ақ батаның» кім екенін де білмейміз, қайдан пайда болғанын білмейміз. Сол жерді алды да қоршап, иеленіп алды», – дейді Шұғыла ауылының тұрғыны Гүлсім Үмбетбаева.

Негізі, бұл жер телімі кезінде тұрғындарға пай үлесі ретінде беріліпті. Содан бері, жұрт оны жеке-жеке аттарына рәсімдемеген. Қолдарында тек жалпыға ортақ акт қана бар.

«Ең болмаса бізге тышқақ бұзау берген жоқ . Сол бұзау алмағаннан кейін біздің пайымызға, еңбегімізге әрқайсымызға 10 сотықтан жер берген», – дейді Шұғыла ауылының тұрғыны Нұрғайша Атақанова.

Ауыл қалаға кірген соң төбе көрсеткен қожайындармен жұрт жылдар бойы соттасып келеді. Ал жуырда ғана Наурызбай ауданының соты қарашаның пайдасына шешім шығарған.

«Наурызбай ауданы оң шешім шығарып берген өткен жолы. Халыққа қайтарылсын бұл жерлер. Сот шешімі ертең енеді. Ертең соңғы күн», – дейді Шұғыла ауылының тұрғыны Мұратбек Есенғазы.

Бірақ, қарсы тарап қараша халық түгілі, сот шешіміне де құлақ асар емес. Яғни, аумаққа жағалай күзетші қойып, ешкімді аттап бастырмай отыр. Сондықтан, шұғылалықтар бүгін қала әкімінен араша сұрай барған. Бірақ, жан айқайын айтқан халыққа мұндағылар да тұщымды жауап бере алмады.

«Соттың шешімі күшіне әлі енген жоқ. Дегенмен, ешқандай да бір жер беру туралы немесе бермеу туралы сұрақтар туындау әлі ерте», – дейді Алматы қаласы жер қатынастары басқармасының басшысы Алтынбек Ахметов.

Шенеуніктер мен жерін даулаған халық дүйсенбіде кездесуге уағдаласып тарқасты. Бұрынғы кеңшар қызметкерлері енді әкімдіктен де көмек болмаса, өз жерімізге өзіміз баса-көктеп кіреміз деп бекініп отыр.

Талқылау