Ақтауда сал ауруына шалдыққан қыз аяғының башпайларымен зергерлік бұйымдар жасайды (видео)

23 жастағы Гүлберген Ғаниева тумысынан сал ауруына шалдыққан. Үш жыл бұрын анасы қызын башпайларымен моншақтан зергерлік бұйымдар жасауға баулиды. Бүгінде қызы өз бетінше алқалар мен қолға тағуға арналған сәнді бұйымдар жасайды.

Бұл туралы Лада хабарлайды.

Гүлбергеннің анасы Шынар Ғаниеваның айтуынша, ол 4 жасына дейін қызының дертке шалдыққанын байқамаған.

«Гүлберген сау болып туылды. Оның сал дертімен ауыратынын 4 жасқа келгенде дәрігер айтты. Оның мүгедектігіне сенбей, құжаттарын жасамай жүрдім. Массажға апарып, екпе салдырдым. Ол қолымен ешнәрсе істей алмайды, тек аяғымен жасайды. Аяғымен сурет салады, аяғы арқылы түтікшемен су ішіп, зергерлік бұйымдар жасайды. Оның жасаған заттарын ғаламтор арқылы, достары арқылы, әлеуметтік желі арқылы көрмеге ұсыманымз. Қызымның тектен-тек жатқанын қаламаймын. Үнемі қозғалыста болып, титтей де болса жеңісіне қуанса екен деймін», – дейді анасы.

Үш жыл бұрын қайырымды жан Гүлбергенге планшет сыйлаған екен. Содан бері ол ғаламтордың белсенді қолданушысына айналды. Оның әлеуметтік желіде достары көп. @Gulbergen парақшасынан оның жасаған жұмыстарын көруге болады.

Қызын әр жаққа апаруға қиындық тудырмау үшін анасы көлік сатып алып, өзі айдайды. Жазда қызын теңізге апармақ.

Шынар Ғаниеваның төрт баласы бар. Олардың бәрінің дені сау.