22-жастағы алматылық Гүлмира «іштегі шақалағын ақшаға айырбастағысы» келеді. Тағдырдың бұл сынына шыдамаған бойжеткен құрсағындағы нəрестені 500 мың теңге несиесін жабу үшін сатпақ болған.

Гүлмира жүргізушілердің қойған сұрақтарына ызаға булыға дүрсе қоя беріп, көзіне еріксіз жас алды. Бұл қыз тағдырына, əлде жасарын жасап, бала пайда болған соң ізін суытқан жауапкершіліксіз əкеге ме, əлде осындай дерттің өрбуіне тоқтау бола алмаған қоғамға өкпелі ме… белгісіз.

«Жігітім екеуіміз бір жыл жүрдік. Менің аяғым ауыр екенін білгеннен кейін, екі апта жанымда жүрді. Мұнан кейін аборт жаса деп ақша әкеліп беріп, кетіп қалды. Қазір ішімдегі балаға 14 апта болды. Дәрігерлерге тексерілдім, дені сау.

Мен баламды еріккеннен біреуге бере салайын деп жатқаным жоқ. 14 аптада оған бауыр басып қалдым. Бірақ басымда несием бар. Оның пайызы өсіп жатыр. Аздап төлесем де, банктен қоңырау шалып, төлеуімді талап етуде.

Баламды босанып, оны жақсы адамдарға бергім келеді. Ол кісілерден ақша сұрап отырған жоқпын. Тек несиемді жауып берсе болды. Амалсыздықтан берейін деп отырмын», – дейді Гүлмира.

Сонымен қатар ол анасының қайтыс болғанын, ал әкесінің басқа отбасы барын айтты. Қазіргі уақытта ағасымен бірге тұрып жатқан бойжеткен жүкті екенін айтуға “ағамнан қорқамын” дейді. Оның сәбиін сатпақ болуына да осы қорқыныш себеп болған тәрізді.

Хабар соңына қарай заң қызметкері шарасыз бойжеткенге несиенің пайыздарын азайту жəне басқа да тиімді жолдарын ақысыз қарастырып беруге дүйім ел алдында уəде етті. Оның жомарттығынан кейін бойжеткеннің ойы өзгере түсті.

“Егер де көмек қолын созып, қол ұшын беремін дейтіндер болса бұл баланы бауырыма басамын”, – деген ойға нық тоқтады ол.

Stan.kz сайтын Telegram арқылы оқыңыз. Арнамызға жазылыңыз.

Талқылау