11 адам көз жұмып, 29-ы жарақаттанды: Алматы-Ташкент тасжолында жантүршігерлік апат болды

Бүгін Алматы-Ташкент тасжолында автобус жолдан шығып, құлап кетті. Апат салдарынан 11 адам көз жұмып, 29 адам зардап шекті, деп хабарлайды Stan.kz ақпарат агенттігі ІІМ-нің баспасөз қызметіне сілтеме жасап.

11 адам көз жұмып, 29-ы жарақаттанды: Алматы-Ташкент тасжолында жантүршігерлік апат болды

Бүгін, 20 сәуірде, таңғы сағат 5-те Жамбыл облысының Қордай ауданында Алматы-Ташкент автожолының 181-ші шақырымында "Тойота камри" маркалы көлік сол бағытта жүріп бара жатқан жүк көлігіне соғылды. Тасжол бойында апатқа ұшыраған көліктердің артынан келе жатқан автобус оларға соғылмайын деп әрекеттеніп, салдарынан жолдан шығып құлап кеткен. 

ЖКО нәтижесінде 8 адам оқиға орнында қаза тауып, 32 адам медициналық мекемелерге жеткізілді. Тағы да 3 адам алған жарақатының салдарынан ауруханада қайтыс болды.

«Оқиға орнына облыс әкімінің бірінші орынбасары, облыс прокуроры, облыстық полиция, төтенше жағдайлар департаменттерінің және қорғаныс істері басқармасының басшылары барды.

Апаттан құтқару жұмыстарына 50 адам және жедел-құтқару, апатты медицина қызметінің және облыстық полиция департаментінің 15 техникасы, сондай-ақ ІІМ ТЖК «Қазәуеқұтқару» қызметінің тікұшағы қатысты», - делінеді хабарламада. 

Апаттан зардап шеккендерге медициналық көмек көрсету үшін, облыстық денсаулық сақтау басқармасының басшысы тәжірибелі үш хирургті алып, оқиға орнына келді.

Облыс әкімдігі дедел штаб жұмысын ұйымдастырды, облыстың төтенше жағдайлар департаментінде психологтардың кезекшілігі қосылған «қауырт желі» құрылды. Зардап шеккендердің туыстары +7(7262) 513575 және +7(7262)514167 нөмірлеріне хабарласа алады.  

Жол-көлік оқиғасы фактісі бойынша Қазақстан Республикасы Қылмыстық кодексінің 345-бабы 4-бөлігі (Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы) бойынша сотқа дейінгі тергеу басталды.

Ішкі істер министрінің тапсырмасы бойынша ІІМ мен облыстың полиция департаменті қызметкерлерінен жедел-тергеу тобы құрылды. 

Оқиғаның мән-жайы тергеу барысында сараптама қорытындысы ескеріле отырып, анықталатын болады.

Çàãðóçêà...
Қазір оқып жатыр