Жамбыл облысында полицейді пышақтап, өртеп жіберген: ІІМ істі айрықша бақылауға алды
Жамбыл облыстық полиция департаменті полицейдің өртелген денесі табылғаны туралы деректі растады, деп хабарлайды Stan.kz ақпарат агенттігі ведомствоның баспасөз қызметіне сілтеме жасап.
Полицейдің денесі 5 шілдеде Шу ауданында табылған.
«Жәбірленушінің тұлғасы анықталды. Ол полиция қызметкері болған. Хирургиялық ота жасатуына байланысты, 2019 жылдың 16 мамырынан бері денсаулығына байланысты еңбек демалысында болған», - делінеді полиция хабарламасында.
Сонымен қатар ведомстводағылар қылмысты ашу мақсатында ІІМ мен Жамбыл облыстық полиция департаментінің тәжірибелі қызметкерлерінен жедел тергеу тобы құрылғанын мәлімдеді.
ҚР ҚК 99-бабы 1-тармағына (Кісі өлтіру) сәйкес сотқа дейінгі тергеу амалдары жүргізіліп жатыр.
Ішкі істер министрлігі істің тергелуін айрықша бақылауға алды.
Еске сала кетсек, бұған дейін БАҚ-та полиция қызметкерін пышақтап, өртеп жібергені туралы ақпарат тараған еді.
Талқылау