Түркістандағы су тасқыны: Бәйдібек ауданында 36 мал суға кетті
Су тасқыны салдарынан Бәйдібек ауданында 36 ұсақ мал суға ағып кетті. Бұл туралы Түркістан облысы Төтенше жағдайлар департаменті бастығының орынбасары Бақытжан Запаров айтты деп хабарлайды Stan.kz ақпарат агенттігі ҚазАқпарат сайтына сілтеме жасап.
Бақытжан Запаровтың айтуынша, қазір Түркістан облысы аумағында жағдай тұрақталған. Судың келуі де тоқтаған. Дегенмен тасқын судан әлі де қауіп бар.
"Өңірдегі бес ауданда 20 елді мекенді су алды. 27 көше мен 234 үйдің ауласына су кірді. Жергілікті атқарушы органдар мен ТЖД қызметкерлерімен 204-тен астам тұрғын қауіпсіз жерге көшірілді. 790 ұсақ мал құтқарылды. Бәйдібек ауданында 36 мал қырылды деген ақпарат тіркелді. Жалпы бірнеше айдан бері өңірде жүргізілген алдын алу жұмыстарының нәтижесінде тасқын судан келер алапат апатқа жол берілген жоқ. Сауранда 4 эвакуациялық орталық ұйымдастырылды. Департаментте штаб құрылды. Облыс аумағында су сейілгенмен, әлі де қауіп бар деп есептейміз. Таулы аумақтағы Төлеби, Қазығұрт аудандарында әлі де қар бар. Жаңбыр жауса осындай төтенше жағдай орын алуы мүмкін" - деді ол.
Төтенше жағдай мамандарының айтуынша, өңірге 7 сағаттың ішінде жауған жаңбырдың көлемі 10 күндік мөлшерден асып түскен. Сонымен қатар 2-4 ақпан күндері таулы аймақтарда жаңбыр, қар жаууы ықтимал. Сондықтан әрбір аудан, қалада су тасқынының алдын алу жұмыстары жүріп жатыр және су басу қаупі бар аймақтар мен су нысандарында 24 сағаттық кезекшілік ұйымдастырылған.
Еске салайық, 2 ақпанда Кентау, Түркістан қалаларында және Бәйдібек, Сауран, Ордабасы аудандарында жауын-шашыннан көшелер мен аулаларды су басып жатқанын хабарлаған едік.
Қазгидромет синоптиктері Түркістан облысында бүгін де жауын жауып, өзендерде су деңгейі көтерілетінін ескертті.
"Бізден 100 есе жоғары алады": Қазақстан мен шетелдік дәрігерлердің жалақысын салыстырып көрдік
