Сириядан оралған 14 қазақстандық азамат терроризмге қатысты айыпталды
Қазақстанға Сириядан қайтып оралған 14 отандасымыз терроризм бойынша айыпталуда. Олар сот алдында жауап береді, деп хабарлайды Stan.kz ақпарат агенттігі ҰҚК-ның баспасөз қызметіне сілтеме жасап.
Ұлттық қауіпсіздік комитеті өзге мемлекеттік органдармен және шетел серіктестерімен бірлесіп, «Жусан» операциясы шеңберінде Сириядан Қазақстанның 595 азаматын қайтарды, оның арасында төрт жүзден астамы – балалар.
«Қайтарылған адамдардың ішінде 10 ер адам мен 5 әйел елімізде тыйым салынған ДАИШ халықаралық террористік ұйымының әрекетіне қатысу фактісі бойынша сотталып, әртүрлі мерзімдерге бас бостандығынан айырылды», - дейді ҰҚК-дағылар.
Тергеу нұсқасы бойынша, Сирия жағдайында ДАИШ-тің бір жасағында болған тағы да 14 азаматқа қатысты қылмыстық істі тергеу аяқталды.
Оларға террористік әрекетке қатысты, әрекетке тартты және терроризмді насихаттады, сондай-ақ өзге де ауыр қылмыстар жасады деген айып тағылып отыр.
ҰҚК мәліметінше, қылмыстық іс материалдары Нұр-Сұлтан қаласының мамандандырылған ауданаралық қылмыстық істер бойынша сотына жіберілді.