Ресейдің қорғаныс министрлігі Новороссийскке екі теңіз дроны шабуыл жасағанын мәлімдеді

Ресейдің қорғаныс министрлігі Новороссийскке екі теңіз дронының шабуыл жасағанын растады. Бұл туралы Stan.kz ақпарат агенттігі ВВС-ге сілтеме жасап хабарлайды. 

Бұған дейін әлеуметтік желі қолданушылары жұмаға қараған түні атыс пен жарылыс дауысы естілгенін жазған. Алдымен жарылыс дауыстары Новороссийсктің батысында естілген. Көп ұзамай жарылған дронның видеосы тарады. 

Ресей қорғаныс министрлігінің ақпаратына сүйенсек 4 тамызға қараған түні әскери теңіз базасына екі украиналық экипажсыз катер шабуыл жасаған. 

"Экипажсыз катердің шабуылына тойтарыс беру кезінде ресейлік кеменің қаруымен катерлер анықталып, жойылды. Ресейлік кемелер әскери теңіз базасын күзетті", – делінген хабарламада.

Шабуыл кезінде аймақтағы Каспий құбыр консорциумының инфрақұрылымы зақымдалмаған. Айта кетері, аталмыш консорциум арқылы Қазақстан мұнайының 80%-ы экспортталады.