Көше адамы: Алматы қаңғыбастарының жан түршігерлік өмірі (фото)
Алматылық қаңғыбастар талантты фотограф әрі белгілі поп-музыкант Иван Бесединнің жаңа жобасында басты кейіпкерге айналды. Суретші бірнеше күнін тамағын қоқыстан тауып, жылуды көше бойындағы құбырлардан іздейтін адамдармен жақын араласуға арнаған. Ол өз кейіпкерлеріне өмірдегі рөлдерін сомдағаны үшін ақы төлеген. Шығармашылықтың адамы әр бір еңбек тиісінше бағалануы керек деп есептейді.
Бұл туралы ЭкспрессК басылымы жазды.
Суретшінің өзге фотографтарға қарағанда ұстанымы мен мақсаты бөлек. Ол ауқатты әрі жұртқа байлығын шашып көрсету үшін жүрген адамдарды емес қарапайым, қиын халдегілерді өзінің кейіпкері етіп таңдайды. Әрі тағдырлы адамдардың өмірі арқылы жайлы тұрып жатқандарға ой салғысы келеді. Оның ойы – мұндай мәселеге қоғам назары ауса, шешу жолдарын әр бір адам ойласа.
«Көше адамы» жобасы алматылықтар үшін үйреншікті жағдайға айланып кеткен қаңғыбастардың өміріне арналады. Үйсіз-күйсіз, құжатсыз, тіпті жасын білмейтін, түсте не жеп, кешке қайда түнейтінін білмейтін жандардың өмірін зерттеу суретшінің басты жұмысы.
«Қарны тоқ, киімі бүтін бақытты адамдар көшедегі қаңғыбасты көргенде қарауға жиіркеніп, елемей өтіп кетуге тырысады. Олар тағдырлы адамның мәселесі жайлы естігісі де , көргісі де келмейді. Біз олардың өмірінің кез келген қорқынышты кинодан өтетінін білмейміз. Сұрауы жоқ қаңғыбасты сатып жіберу, жағар май құйып өртеп тастау оқиғалары тек ресейде емес. Біздің де жастардың арасында сондай әрекетке баратындар бар. Қазір дамыған заман. Қаңғыбастар паналайтын орын болса деген арманым бар»,-дейді фотограф.
