Қазақстан мұнайы Босфор бұғазында тұрып қалған: Энергетика министрлігі ақпаратқа жауап берді
Қазақстаннан миллиондаған баррель мұнай тасымалдайтын танкерлер Анкараның осы кемелерге сақтандыру кепілдігін беру талабы салдарынан Түрік бұғаздарында тұрып қалғаны туралы ақпарат жарияланды. ҚР энергетика министрлігі ақпаратқа жауап берді, деп хабарлайды Stan.kz ақпарат агенттігі.
Миллиондаған баррель қазақстандық мұнайды тасымалдайтын мұнай танкерлері Қара теңізден әлемдік нарыққа шыға алмай қалған. Түркия тарапы мұнайдың сақтандырылғаны туралы дәлел талап етіп отыр.
Мәселелер ЕО-ның Ресейден мұнайға жаңа шектеулер енгізуі аясында туындағаны нақтыланды. Қазақстан мұнайына санкция салынбағанына қарамастан, Түркия бұл мұнай тиелген танкерлердің Ресей портынан шығып кеткеніне алаңдаушылық танытқан, деп жазды Bloomberg.
"Қара теңіздегі Босфор бұғазында және Мәрмәр теңізіндегі бекіністе 13 танкер әлі тұр. Тек біреуінде ресейлік жүк бар. 10 кеме Қазақстаннан Еуропаға шикі мұнай тасымалдайтын танкері. Жүк 28 қарашадан бастап 2 желтоқсанға дейін Каспий құбыр консорциумының (КТК) терминалында тиелген", - делінген мақалада.
ҚР энергетика министрлігі ақпаратқа қатысты жауап берді.
"Босфор мен Дарданел бұғазында күту уақыты 6 күн. Қысқы маусым үшін бұл қалыпты жағдай. Былтыр желтоқсанда бұғаздарда күту уақыты шамамен 14 күнді құрайды. Сақтандыру хаттарына келетін болсақ, егжей-тегжейлі ақпарат әзірленуде", - деп жауап берді министрлік.