Шымкентте көз жұмған полицейдің өлімі үшін айыпталған дәрігер екі жылға шартты түрде сотталды
Шымкенттегі полиция қызметкерінің көз жұмуына себепші болған дәрігерге үкім шығарды. Ол екі жылға шартты түрде бас бостандығынан айырылды.
"Дау-Мед" жеке емханасыда бұрынғы хирург-дәрігер Шымкент қалалық полиция қызметкеріне екпе салды. Екпе салдарынан полицей көз жұмды.
"Сот үкімімен айыпталушы шартты түрде екі жылға бас бостандығынан, үш жыл мерзімге медициналық қызметпен айналысу құқығынан айырылды", - делінген хабарламада.
Оқиға 2018 жылдың 25 қыркүйегінде болды. Әл-Фараби ІІБ-нің кезекші бөліміне жеке емханада науқастың қайтыс болғанын хабарлады. Оқиға орнына келген полиция қызметкерлері қаза тапқан адамның Шымкент қалалық ДП қызметкері екенін анықтады.
Тергеу Қазақстан Республикасы Қылмыстық кодексінің "Медициналық немесе фармацевтикалық қызметкердің кәсіби міндеттерін дұрыс орындамау" бабы бойынша жүргізілді.
"Басты сот талқылауы барысында айыпталушы өзінің кінәсін толық мойындады, Ісіне өкінетінін айтты. Жәбірленуші тараптан кешірім сұрап, туыстарына моральдық өтемақы төлейтінін айтты. Сондықтан жәбірленуші тараптың өкілі айыпталушыға бас бостандығынан айырмау жазасын беруді сұрады", - делінген хабарламада.