Ақтөбеде медицина, білім саласы, прокуратура қызметі мен "Ақтөбе "әлеуметтік-кәсіпкерлік корпорациясы" АҚ -ның жұмыстары сынға алыныпты. Тексеріс жүргізгендер Ақтөбенің денсаулық сақтау басқармасы елдегі коронавирусқа байланысты жағдайды пайдаларына асырған деп отыр. Сөздерінше, жасанды тыныс алу аппаратын 22 миллион теңгеге, яғни нарықтағы бағадан бес миллион теңгеге қымбат алған. Алайда облыстың мамандары мемлекеттік сатып алуда заңмен бекітілген баға болмайды деп отыр.

"ИВЛ-дің бағалары өзінің комплектующий құралына, функцияларына байланысты бағалары әртүрлі болып келеді. Қазақстандық ИВЛ деп мысалға 8-9 миллион теңге, шет елдік ИВЛ - дер бар 22-25 миллионға дейін барады", - деді Ақтөбе облыстық Денсаулық сақтау басқармасының бөлім басшысы Самғат Ишниязов.

Сонымен қатар, жергілікті билік қала маңындағы екі бірдей ауылда мектеп жасындағы балалар санының аздығын біле тұра мектеп салу үшін бюджеттен екі жарым миллиард теңге бөлген. Сондай-ақ жемқорлыққа қарсы қоғамдық кеңес назарына "Ақтөбе "әлеуметтік-кәсіпкерлік корпорациясы" АҚ - да ілініпті. Өзі үшін де, облыс экономикасы үшін де дұрыс жұмыс жасамаған деген корпорация қарызының көлемі шамамен 700 миллион теңге, ал мерзімі өткен дебиторлық берешек көлемі бір жарым миллиард теңгеге жетіпті. Бірақ бұл қорытындылармен корпорация келіспейді.

"Толығымен келісе алмаймын. Өйткені бұл 2019 жылы болған тексеру комиссиясының нәтижесін толықтай алып, сол ақпаратты берген", - дейді "Ақтөбе "әлеуметтік-кәсіпкерлік корпорациясы" АҚ директорының орынбасары Айдос Ақдәулет.

Айта кетейік, Ақтөбе облысы бойынша бұрын тоқтатылған қылмыстық істерге қайта тексеру жүргізуді ұсынылды.

Талқылау