Аида Балаева мемлекет басшысының көмекшісі болып тағайындалды
Қасым-Жомарт Тоқаев Аида Балаеваены жаңа қызметке тағайындады, деп хабарлайды Stan.kz ақпарат агенттігі Ақордаға сілтеме жасап.
Мемлекет басшысының өкімімен Аида Ғалымқызы Балаева ҚР Президенті әкімшілігінің Ішкі саясат бөлімінің меңгерушісі қызметінен босатылды.
"Аида Ғалымқызы Балаева Қазақстан Республикасы президентінің көмекшісі – Қазақстан Республикасы президенті әкімшілігінің өтініштерді қарауды бақылау бөлімінің меңгерушісі болып тағайындалсын", - деп жазылған президенттің жарлығында.
Аида Балаева 1999 жылдан бастап мемлекеттік қызметте. Ол қызметін Қазақстан Республикасы Ақпарат және қоғамдық келісім министрлігінің Алматы облыстық ақпарат және қоғамдық келісім басқармасының қоғамдық-саяси процестерді талдау және үйлестіру бөлімінің жетекші маманы болып бастаған. 2006 жылы Алматы қаласының Ішкі саясат департаментінің директоры болған. 2008 жылдың сәуір айынан бастап Нұр-Сұлтандағы Ішкі саясат департаментінің директоры, кейін басқарма бастығы болып жұмыс істеген. 2010 жылғы ақпаннан бастап елордада әкім орынбасарының қызметін атқарған. 2014 жылдың желтоқсанынан бастап Балаева президент әкімшілігінде ішкі саясат бөлімінің меңгерушісі қызметіне кіріскен.