Жоғалып кеткен Ерасылдың достары, оны ұрлап әкетті деп ойлайды
Астана қаласында жоғалып кеткен Ерасылдың достары, оны біреулер ұрлап әкетті деген пікірде. Олар мұндай пікірге экстрасенстерге барғаннан кейін келген. Көріпкелдер Астанадағы медициналық университеттің 6 курс студенті тірі деген ақпар айтқан.
Бұл туралы 31 арна хабарлайды.
Қазір іздестіру жұмыстарына 1000-ға тарта адам қосылған. Ерасылды іздеуге кіріскен адамдар тек ғана медициналық университет студенттері емес. Арасында еріктілер, басқа да оқу орындарының студенттері, қала тұрғындары да бар. Қазірге дейін адамдар қаланың 80 пайызын кезіп шыққан. Еріктілер тіпті қала аумағынан шығып, ауылдық жерлерге дейін барған.
«Бізге басқа қалалардан да хабарласып жатыр. Олар да іздеу жазылған парақшаларды іліп жатыр екен. Ерасылды іздеуге демек тек Астана ғана емес, бүкіл Қазақстан атсалысып жатыр. Олардың бізді қолдағаны үшін алғыс білдіреміз дейді», – Ания Күдеринова есімді ерікті.
Ерасыл Әубәкіров 3 ақпан күні кешкілік үйден шығып кетіп, байланыстан ажыраған. Келесі күні ол маңызды емтиханға да келмеген. Осыдан соң іздеу басталады. Оның жоғалғанына бес тәулік болғанына қарамастан, жақындары мен достары үміттерін үзбей отыр.
«Біз шарамыз таусылып көріпкелдерге барғанда, олар оны біреулердің ұрлап әкетіп ұстап отырғанын айтты. Біз оны қалайда табамыз деп ойлаймын», – дейді Ерасылдың досы Әнуар Мұсағазин.
Алайда, ұрлап әкетуге қатысты құқық қорғау органдары нақты мәлімдеме жасамады. Қазір іздеу шараларына кинологиялық топтар да қосылды. Осыған дейін Астанадағы медициналық университеттің 6 курс студенті Ерасыл Әубәкіровтың жоғалып кеткені туралы ақпарат тараған еді.