Жапондық мамандар «көрінбейтін» пойыздар шығарғалы жатыр

Сағатына 300 шақырым жылдамдықпен жүре алатын пойыздарды жасап шығарған Жапония инженерлері мұнымен тоқтап қалмақ емес.

Бұл туралы ҚазАқпарат хабарлайды.

Енді олар бірегей жоба – «көрінбейтін» пойыздарды құрастырып жатыр.

Қазіргі уқытта сәулетші Казуё Седзима мен оның тобы қоршаған ортамен «тұтасатын» құрамды шығарумен айналысуда. Аталған жоба Seibu Group компаниясының тапсырысы бойынша дайындалып жатыр. Атақты Red Arrow пойызының жаңа нұсқасы компанияның 100 жылдығына қарсаңында дайын болады.

Сәулетшінің ойластырғанындай, құрам жартылай шағылыстыратын материалмен жабылып, сол арқылы көрінбейтін болады. Сондай-ақ өзгерістер оның интерьеріне де қатысты – сапар кезінде жолаушылардың өздерін үйде жүргендей сезініп, демалуы үшін пойыздың ішінде барлық жағдай жасалады.

Бұл өзгерістер пойыздардың шектеулі санына ғана енгізілетіні шамаланып отыр, мұндай жаңғырту жұмыстары бірінші кезекте 1993 жылдан бері қызмет етіп жүрген Seibu 1000 сериялы электр пойыздарында жүргізіледі. Қоршаған табиғи ортаға 100 пайыз еніп кететін құрамдар 2018 жылдан бастап жолға шығады.