Виталий Иванов «ПромГарант» фирмасында 2011 жылдан бері жұмыс істеп келеді. Еліміз бойынша ірі зауыттар мен маңызды ғимараттардың бой көтерілуіне аянбай еңбек еттім дейді. Бірақ, былтырдан бері Астананың төрінде ЭКСПО-2017 көрмесіне арналған құрылыс жұмыстарында аяғын сындырып алған. Ол аздай басшылығы бір жылдық еңбекақымды бермей жүр екен.

«Менің несиелерім шарықтап кеткен. Коммуналдық төлемдер өз алдына қарыз. Бір жылдан бері алдаумен келеді. Әне-міне деген сөздерінен шаршадық», – дейді «ПромГарант» ЖШС жұмысшысы Виталий Иванов.

Бүкіл елден шақыртылған қонақтарды тамсандырып, әлемге Қазақстанды әйгілі етеміз деген ЭКСПО құрылысына Виталийден бөлек тағы 100 адам білек сыбана кіріскен. Бірақ басшылық бір жылдан бері ешбіріне соқыр тиын да ұстатпапты. Сондықтан, прокуратура мен еңбек инспекциясына шағымданғанын айтады. Ал, мемлекеттік қызметкерлер бәрі қадағалауымызда дейді.

«Қазір 28 адамнан шағым түсті. Мердігердің берешегі белгіленді. Уақытылы қайтармаған соң азаматтық сотқа арыз жаздық», – дейді Теміртау қаласының мемлекеттік еңбек инспекциясы бөлімінің жетекшісі Ерболат Дүсіпов.

Ал, «ПромГарант» ЖШС-нің жұмысы әзірге тұралап тұр. ЭКСПО-2017 түсіп жатқан қаржы жоқ, қазір әлемде дағдарыс дейді. Егер, наурыз айында тапсырыс түссе, сол қаржыдан өтеуге серт берді.

«ПромГарант» ЖШС директор орынбасары Александр Туркин қарыздың жартысын өтегенін, қалған 11 млн 700 мың қарызды наурыз айында төлейтіндерін айтады.

Талқылау