«XXI ғасырдағы Алдар Көсе» атты фильм түсіріліп жатыр
Жаңа жыл қарсаңында Tengri media production кинокомпаниясы Қазақстан халқына «XXI ғасырдағы Алдар Көсе» фильмін ұсынбақ
Бұл туралы express-k.kz хабарлады.
Жаңа жыл қарсаңында әрбір адам іштей бір ертегіге сеніп, сол ғажайыпты күтері анық. Сол ғажайыпты «XXI ғасырдағы Алдар Көсе» фильмінің басты кейіпкері бизнесмен Медет те күткен. Алайда ол күткен ғажайыптың орнына жағымсыз жаңалыққа кез болады. Өз компаниясының қызметкерінің бірі Медетті сатып кетіп, компаниясы банкрот болудың сәл алдында тұрады. Оның үстіне Медеттің отбасындағылар, әсіресе, енесі де оны қыспаққа ала бастайды. Міне, осы кезде Алдар Көсе көмекке келеді. Ол Аяз атамен қосылып Медетті тығырықтан алып шығады.
Фильмде Медеттің рөлін КВН-да өнер көрсетуімен есте қалған Нұржан Бейсенов, Алдар Көсе рөлін Шыныбек Рахмашев ойнайды. Оған қоса көрермендер Фархат Абдраимов, Қаракөз Тілеубекова, Обид Асомов және Дина Тасболатова сынды актерлерді көріп, көзайым болмақ. Бұл фильм қоюшы-режиссер Азиз Өмірзақовтың комедия жанрындағы тұңғыш фильмі.