Тоқаев қазақстандықтарды "Спутник лайт" вакцинасымен қамтамасыз етуді тапсырды

Мемлекет басшысы ресейлік "Спутник лайт" вакцинасын Қазақстанға жеткізу және шығару мәселесін пысықтау қажет екенін айтты, деп хабарлайды Stan.kz ақпарат агенттігі. 

"Тағы бір мәселе осы саладағы жетекші өндірушілердің вакциналар желісін кеңейту қажеттілігімен байланысты. Отандық фармацевтикалық алаңдарда ресейлік жаңа "Спутник лайт" вакцинасын жеткізу және шығару мәселесін пысықтау қажет", – деді Қасым-Жомарт Тоқаев.

Президент қыркүйекте отандық QazVac вакцинасын өнеркәсіптік көлемде шығару жоспарланғанын еске салып, оны дүниежүзілік денсаулық сақтау ұйымында тіркеуді жеделдету қажеттігін айтты. Бұл міндет денсаулық сақтау министрлігі мен сыртқы істер министрлігіне жүктеліп отыр.

• Pfizer Қазақстанға биыл жеткізілмек: Бұл қандай вакцина


• Қасым-Жомарт Тоқаев мәжбүрлі вакцинация туралы: Біз мұндай қадамға бармаймыз

"Екі жақты уағдаластықтар шеңберінде QazVac-ты үшінші елдер нарығына ілгерілету жөніндегі жұмысты ұйымдастырудың маңызы зор. Үкіметтен осы мәселені ерекше бақылауға алып, нәтижелері туралы бір ай мерзімде баяндауды сұраймын", – деген президент вакцинация мәселесінде отандық бизнестің қолдауы өте маңызды екенін атады.

“Өйткені ұжымдық иммунитетке қол жеткізбесек, бизнес үшін маңызды санитарлық шектеулерді толығымен алып тастау мүмкін емес", – деді мемлекет басшысы.

Еске салсақ, осыған дейін Ресей президенті Владимир Путин ресейлік тағы бір вакцина – "Спутник Лайт" тіркеуге дайын екенін мәлімдеген болатын.