Түрік ақпарат құралдары төңкеріс жасаған генералдардың суретін жариялады
Түрік ақпарат құралдары мемлекеттің әскери саласында биік қызметтерде отырған тұлғалардың суреттерін жариялады. Олардың барлығы елдегі әскери төңкерісті ұйымдастырды деп айыпталып отыр.
Фото: odatv.com
Бұл туралы “Комсомольская правда” хабарлайды.
Суреттерден көргендей олардың көбі жарақат алған. Бірқатары тұтқындау операциясы кезінде жараланған секілді. Көп адам түскен суреттегі ортада ақ-жасыл жейдедегі төңкеріс ұйымдастырушы негізгі адам деп сипатталған – Ақын Өзтүрік.
Бұған дейін Анкарада генерал Хакан Эврим, үшінші армия корпусының қолбасшысы Эрдал Өзтүрік, екінші армия қолбасшысы Адем Худути, Денизли гарнизонының қолбасшысы және арнайы қызметтің 11-ші полкындағы генерал Кәмил Озхан Өзбақыр, сондай-ақ, 14 генерал мен адмиралдардың ұсталғаны хабарланған еді.
Ұсталғандардың арасында ресейлік СУ-24 ұшағын атып түсірген екі ұшқыш та бар екен.
Түрік билігі жалпы саны 6 мыңнан астам адамды тұтқындап, оларды мемлекеттік төңкеріс жасауға әрекеттенді деп кінәлауда. Ал генерал Ақын Өзтүрік болса өз кінәсін мойындаудан бас тартқан. “Мен 15 шілде күнгі әскери төңкерісті жоспарлап, ұйымдастырған адам емеспін. Оны кім ұйымдастырып, кім бастағанын білмеймін”, – деді ол.
Генерал сол күні төңкерісшілер штабы орналасқан Акынджи әуе базасына кездейсоқ тап болғанын айтты. Ал мемлекеттік төңкеріс туралы теледидардан естіпті. Өзтүріктің айтуынша, мұндай төңкерісті басқа мемлекет ұйымдастыруы мүмкін екен. Ал ол АҚШ-та тұратын “Фетхуллах Гюлен жасады” деген нұсқамен онша келіспейтінін жариялады.
15 шілде күні, кешке Түркияда әскери төңкеріс әрекеті орын алған. Әскерилер ел билігін қолына алуға тырысқанымен, билік дер кезінде жағдайды реттеп үлгерді. Нәтижесінде 290 адам көз жұмды.