Сейітқазы Матаевтың қан қысымы көтерілгендіктен ауруханаға жайғастырылды
Қазақстан журналистер одағының төрағасы, “мемлекет қаржысын жымқырды” және “салық төлеуден жалтарды” деген күдікпен тергеліп жатқан Сейітқазы Матаев ауруханаға түсті.
Сурет: vlast.kz
Бұл туралы КазТАГ хабарлайды.
Алматыдағы кардиологиялық орталық Матаевтың 7 сәуір күні кешке түскенін хабарлады.
Алматы қалалық жемқорлыққа қарсы қызметінің қызметкерлері Матаевқа шақырту қағазын жеткізіп, оның тергеуге міндетті түрде келуін сұраған. Сол уақытта Матаевтың қан қысымы көтеріліп кеткен. Матаевтың адвокаттары жедел тергеу тобының жетекшісін Сейітқазы Матаев денсаулығына байланысты тергеуге бара алмайтынын айтқан.
Сейітқазы Матаев 24 ақпаннан бері үйқамақта отыр. Оның ұлы, ҚазТАГ агенттігінің жетекшісі Әсет Матаев та үйқамақта отыр. Олар мемлекеттен ақпараттық саясатқа бөлінген қаржыны жымқыру ісі бойынша күдікті ретінде танылып, қамауда отыр. Матаевтар өздеріне тағылған айыпты жоққа шығарып, істі үкіметтік емес бірлестік пен ақпарат құралына қысым деп бағалайды.
Бұған дейін Қазақстан журналистер одағының басшысы үй қамағына алынғанын және денсаулығы нашарлап ауруханаға түскенін хабарлаған болатынбыз.