Семейде сәбилерге есім Алғыс айту күніне байланысты қойылды

Семейде еліміздің жаңа мерекесі – Алғыс айту күні ерекше аталып өтілді. “Мен алғыс айтамын!” атауымен ұйымдастырылған флешмоб Достық үйіндегі этнобірлестік өкілдерінің мерекелік концертіне ұласты.

Бұл туралы 24.kz сайты хабарлайды.

Айтулы мереке қарсаңында қала перзентханалары да ерекше шаралар легін қолға алған. “Сүйінші” шарасы көпшілікті қуанышқа бөлеп, мерекелік көңіл-күйді арттыра түсті. Қаланың белсенді азаматтары алғыс айту күнінде дүние есігін ашқан сәбилерге сыйлықтар жасады.

Жалпы, осы күні қалада 15 нәресте өмірге келіпті. Кей ата-аналар мерекеге орайластырып балаларына Алғысбай, Рахметжан деген есімдер берген.

“Бұл күні таңертеңнен бастап бір-бірімізге мейрамда алғысымызды білдірдік. Барлықтарымыздың көңіл-күйіміз жоғары, жақсы”, – дейді дәрігер Самал Уәли.