Семейде пәтер ішінен ойынхана ашқан қытай азаматы сотталды

Семейде құмар ойынды кәсіп қылған қос азамат сотталды. Көлеңкелі бизнесті ұйымдастырған қытайлық келімсек Тань Пэнцао 7 жылға, ал оның серіктесі Ринат Гилажитдинов 6 жылға бас бостандығынан айырылды. Сондай-ақ, олардың жеке мүліктері де тәркіленетін болды, – деп хабарлайды ктк арнасы.

27 және 35 жастағы екі жігіттің қулығына құрық бойламаған. Олар оңай олжаға кенелу үшін ойын автоматтарының бағдарламасын толықтай компьютерлерге орнатқан екен. Сөйтіп, қаланың әр ықшамауданында орналасқан 5 бірдей пәтерде ойынхана ашқан. Онда келген жұрттың да қарасы көп болған сыңайлы. Өйткені астыртын бизнестен жылына 10 млн.теңге пайда тауыпты. Яғни екеуі бірігіп жұмыс істеген төрт жылда 40 миллионды қалтаға басқан. Тіпті кассир мен күзетші де ұстаған. Енді олар жазаларын жалпы тәртіптегі түзету колониясында өтейді.